संघर्षातून घडलेले पत्रकारितेतील नेतृत्व; ज्ञानेश्वर पाटील यांच्या वाढदिवसानिमित्त शुभेच्छांचा वर्षाव.

प्रतिनिधी -सोलापूर 
कोल्हापूर जिल्ह्यातील चंदगड तालुक्यातील न्हावेली या निसर्गरम्य आणि संस्कारांची परंपरा जपणाऱ्या गावातील सुपुत्र, महाराष्ट्र माझा 24 लाईव्हचे संपादक तथा ज्येष्ठ पत्रकार ज्ञानेश्वर पाटील यांच्या वाढदिवसानिमित्त विविध क्षेत्रांतून शुभेच्छांचा वर्षाव होत आहे. पत्रकारिता, समाजसेवा आणि जनहिताच्या कार्यातून त्यांनी निर्माण केलेल्या वेगळ्या ओळखीमुळे आज ते अनेकांसाठी प्रेरणास्थान ठरले आहेत.समाजसेवेचा वारसा लाभलेल्या कुटुंबात वाढलेल्या ज्ञानेश्वर पाटील यांचे आजोबा कै. पोलीस पाटील यशवंत गावडे हे गावातील मान्यवर व्यक्तिमत्त्व म्हणून ओळखले जात होते, तर कै. जयराम गावडे यांनीही समाजकार्यातून आपला ठसा उमटविला होता. याच सामाजिक संस्कारांच्या बळावर त्यांनी जीवनातील संघर्षांना सामोरे जात स्वतःचे वेगळे स्थान निर्माण केले.लहान वयातच वडिलांचे छत्र हरपल्यानंतर अनेक अडचणींचा सामना करत त्यांनी शिक्षण पूर्ण केले. पदवी शिक्षणासोबत पत्रकारितेचे व्यावसायिक शिक्षण घेत समाजातील वंचित, दुर्लक्षित आणि अन्यायग्रस्त घटकांचा आवाज बनण्याचा निर्धार केला. संघर्षातून घडलेल्या या तरुणाने आपल्या मेहनतीच्या जोरावर पत्रकारितेच्या क्षेत्रात स्वतंत्र ओळख निर्माण केली.
वयाच्या अवघ्या 21 व्या वर्षी पत्रकारितेत पदार्पण करत त्यांनी जनतेचे प्रश्न प्रशासनापर्यंत पोहोचविण्याचे कार्य सुरू केले. गेल्या 11 वर्षांपासून दैनिक शरदनगरी, दैनिक वार्ता बेळगाव, सी. मराठी, लोकमंथन यांसह विविध माध्यमांतून त्यांनी कार्य करत अभ्यासू, निर्भीड आणि रोखठोक पत्रकार म्हणून नावलौकिक मिळविला.चंदगड, आजरा, गडहिंग्लज, कोल्हापूर, पुणे तसेच पश्चिम महाराष्ट्रातील सामाजिक, शैक्षणिक, कृषी, राजकीय आणि विकासात्मक प्रश्नांना त्यांनी सातत्याने वाचा फोडली. शेतकरी, कामगार, विद्यार्थी आणि सर्वसामान्य नागरिकांच्या समस्या प्रशासनापर्यंत पोहोचवून अनेक प्रश्नांच्या निराकरणासाठी त्यांनी महत्त्वपूर्ण भूमिका बजावली. त्यांच्या बातम्यांमुळे अनेकदा प्रशासनाला तातडीने दखल घ्यावी लागली आणि नागरिकांना न्याय मिळाला.
पत्रकारिता हे केवळ बातमी देण्याचे माध्यम नसून समाजपरिवर्तनाचे प्रभावी शस्त्र आहे, या विचारातून त्यांनी ‘महाराष्ट्र माझा 24 लाईव्ह’ या डिजिटल वृत्तवाहिनीची स्थापना केली. सत्य, निर्भीडता, पारदर्शकता आणि लोकहित या मूल्यांवर उभ्या असलेल्या या वृत्तवाहिनीने अल्पावधीतच राज्यभरात विश्वासार्ह माध्यम म्हणून ओळख निर्माण केली आहे.विशेष म्हणजे स्वतःची वाटचाल घडवत असताना त्यांनी ग्रामीण भागातील अनेक नवोदित पत्रकारांना संधी उपलब्ध करून दिली. त्यांच्या मार्गदर्शनातून अनेक युवक पत्रकारिता क्षेत्रात कार्यरत असून समाजातील प्रश्न मांडण्याचे काम करत आहेत.
पत्रकारिता आणि सामाजिक क्षेत्रातील उल्लेखनीय योगदानाची दखल घेत त्यांना राष्ट्रीय समाजरत्न पुरस्कार, आदर्श युवारत्न पुरस्कार यांसह विविध सन्मानांनी गौरविण्यात आले आहे. हे पुरस्कार त्यांच्या समाजहिताच्या कार्याची आणि निर्भीड पत्रकारितेची साक्ष देणारे आहेत.
आज महाराष्ट्र माझा 24 लाईव्हचे संपादक म्हणून ते यशस्वीपणे धुरा सांभाळत असून पत्रकारितेच्या माध्यमातून समाजप्रबोधनाचे कार्य अखंडपणे सुरू ठेवत आहेत. संघर्षातून उभे राहिलेले, सत्यासाठी लढणारे, जनतेच्या प्रश्नांना न्याय मिळवून देण्यासाठी झटणारे आणि नव्या पिढीला दिशा देणारे ज्ञानेश्वर पाटील हे आज अनेकांसाठी प्रेरणेचे स्रोत बनले आहेत.त्यांच्या वाढदिवसानिमित्त विविध क्षेत्रातील मान्यवर, पत्रकार, सामाजिक कार्यकर्ते, राजकीय नेते आणि असंख्य शुभचिंतकांकडून शुभेच्छांचा वर्षाव होत असून त्यांच्या पुढील वाटचालीसाठी यश, आरोग्य आणि दीर्घायुष्याच्या शुभेच्छा व्यक्त केल्या जात आहेत.

---------------------------------------

🔹जनता संघर्ष न्यूज, सोलापूर 

🔹बातम्या व जाहिरातीसाठी संपर्क -9579838240