'एआय’चा वापर करून एसीएस हॉस्पिटलमध्ये यशस्वी हृदय शस्त्रक्रिया; सोलापूरच्या वैद्यकीय क्षेत्राला मानाचा तुरा.

सोलापूर | प्रतिनिधी
सोलापूरच्या वैद्यकीय क्षेत्रात क्रांतिकारी पाऊल टाकत एसीएस हॉस्पिटलने कृत्रिम बुद्धिमत्तेच्या (AI) मदतीने एकाच दिवशी तीन अतिजटिल हृदय शस्त्रक्रिया यशस्वीरित्या पार पाडल्या. भैय्या चौक येथील या रुग्णालयात सोमवार, दिनांक २२ जुलै रोजी या शस्त्रक्रिया करण्यात आल्या असून, या यशस्वी उपक्रमामुळे सोलापूरच्या वैद्यकीय क्षमतेला एक नवा आयाम मिळाला आहे.
या शस्त्रक्रिया आंतरराष्ट्रीय ख्यातीचे हृदयरोगतज्ज्ञ डॉ. जसकरण सिंग दुग्गल यांच्या मार्गदर्शनाखाली डॉ. प्रमोद पवार आणि डॉ. सिद्धांत गांधी यांनी केल्या. या यशाबद्दल शुक्रवारी आयोजित पत्रकार परिषदेत माहिती देण्यात आली.

हृदयाच्या आजारांवरील अशा प्रकारच्या शस्त्रक्रियेत आयव्हस, रोटा अब्लेशन, बायफरगेशन एन्जोप्लास्टी, इंट्रावॅस्क्युलर लिथोट्रिप्सी आणि अल्ट्रा लो कॉन्ट्रास यांसारख्या अत्याधुनिक पद्धती वापरण्यात आल्या. यामध्ये AI चा वापर करून निदान केल्यास शस्त्रक्रियेची अचूकता मोठ्या प्रमाणात वाढते, हे संशोधनातून स्पष्ट झाले आहे. सोमवारी आयोजित कार्यशाळेत डॉ. दुग्गल यांनी या विषयावर सविस्तर मार्गदर्शन केले आणि शस्त्रक्रियेत सहभाग घेतला.
पुण्यातील रुग्णाने सोलापूर गाठले
पुण्याच्या एका रुग्णाची एक वर्षापूर्वी बायपास शस्त्रक्रिया झाली होती, परंतु सहा महिन्यांतच रक्तवाहिन्या बंद झाल्या. तीन महिन्यांपूर्वी एन्जोप्लास्टी करूनही त्रास कायम होता. त्यामुळे त्यांनी सोलापूरच्या एसीएस हॉस्पिटलमध्ये उपचार घेणे पसंत केले. त्यांच्यावर तीन तास चाललेली शस्त्रक्रिया यशस्वी झाली. या रुग्णासह सोलापूर आणि धाराशिव येथील प्रत्येकी एक रुग्णावर देखील AI च्या साहाय्याने निदान करून यशस्वी शस्त्रक्रिया करण्यात आल्या.
AI वापरामुळे निदान अधिक अचूक
या रुग्णांच्या हृदयात रक्तवाहिन्यांचे द्विभाजन झाल्यामुळे बायफरगेशन या तंत्रज्ञानाचा वापर करून दोन्ही भागांतील रक्तपुरवठा सुरळीत करण्यात आला. शस्त्रक्रिया प्रत्येकी दीड तास चालली. गुरुवारी तिन्ही रुग्णांना डिस्चार्ज देण्यात आला.
डॉ. दुग्गल यांचा विशेष सन्मान
या शस्त्रक्रियेसाठी मोलाची साथ दिल्याबद्दल डॉ. जसकरण दुग्गल यांचा डॉ. प्रमोद पवार, डॉ. सिद्धांत गांधी, डॉ. राहुल कारीमुंगी आणि डॉ. दीपक गायकवाड यांनी सन्मान केला. या उपक्रमामुळे सोलापूरच्या वैद्यकीय क्षेत्राच्या शिरपेचात मानाचा तुरा खोवला गेला आहे.
मुंबई-पुण्यातून सोलापूरकडे वाढती ओढ
सोलापूरच्या वैद्यकीय सेवेचा दर्जा आणि वैद्यकीय पायाभूत सुविधा वाढत असल्यामुळे मुंबई आणि पुणे येथून उपचारांसाठी सोलापूरकडे वळणाऱ्या रुग्णांची संख्या लक्षणीयरीत्या वाढली आहे.
डॉ. जसकरण सिंग दुग्गल कोण आहेत?
डॉ. दुग्गल हे मुंबईच्या जहांगीर हॉस्पिटलमध्ये वरिष्ठ हृदयरोगतज्ज्ञ म्हणून कार्यरत असून, त्यांनी अनेक वर्षे आर्मी हॉस्पिटलमध्ये सेवा बजावली आहे. आंतरराष्ट्रीय दर्जाच्या वैद्यकीय क्षेत्रात त्यांचा मोठा अनुभव आहे.
आंतरराष्ट्रीय तंत्रज्ञानाचे प्रशिक्षण
डॉ. प्रमोद पवार यांनी चेन्नईच्या मद्रास मेडिकल मिशन आणि कोचीनच्या लिसी हॉस्पिटलमध्ये रोटा अब्लेशन आणि आयव्हस तंत्रज्ञानाचे तांत्रिक व शास्त्रीय प्रशिक्षण घेतले आहे. हे तंत्रज्ञान त्यांनी सोलापूरातील रुग्णांवर यशस्वीरित्या वापरले.
रुग्णाचा अनुभव:
"पुण्यात बायपास झाल्यानंतरही माझा त्रास थांबला नव्हता. मात्र सोलापुरात डॉ. प्रमोद पवार यांच्याकडे केवळ अर्ध्या खर्चात शस्त्रक्रिया करून घेतली आणि आता प्रकृती उत्तम आहे."
— अनिल चव्हाण, पुणे
"रुग्णांना आंतरराष्ट्रीय दर्जाचे तंत्रज्ञान उपलब्ध करून देणे हे आमचे ध्येय आहे. यासाठी आम्ही विविध ठिकाणी प्रशिक्षण घेतले आहे."
— डॉ. प्रमोद पवार, कार्डियोलॉजिस्ट, एसीएस हॉस्पिटल
संपादकीय टिप्पणी:
AI चा वापर करून सोलापुरात पार पडलेल्या या तीन यशस्वी हृदयशस्त्रक्रिया हा वैद्यकीय क्षेत्रातील मोठा टप्पा असून, सोलापुराला महाराष्ट्रातील एक वैद्यकीय केंद्रबिंदू म्हणून अधोरेखित करणारा आहे.